Аймгийн ИТХ-ын дэргэдэх Хөдөө аж ахуй, байгаль орчин, аялал жуулчлал хариуцсан ахмад зөввлөх, Монгол Улсын Соёлын гавьяат зүтгэлтэн, ахмад сэтгүүлч Г.Жамцын “Үхэр тэргээр аялсан сонин сайхан” нэртэй шинэ ном хэвлэгджээ. Ахмад сэтгүүлчийн 15 дахь энэ номонд түүний дурсамж, эргэцүүлэл, бодрол, тэмдэглэлүүд багтжээ.

“Улсын машин унаагүй, дарга байгаагүй эгэл жирийн зохиолч, сэтгүүлчийн хөдөлмөр нь  үхэр тэргээр туулай гүйцэх гэсэн хэлцтэй шууд утгаараа дүйцэхээр санагддаг тул номоо ийн нэрийдсэн” хэмээн зохиолч өөрөө хэлжээ.

Номонд зөвхөн зохиолчийн үзэж туулсан замнал төдийгүй бусад нэрт зохиолч, сэтгүүлчдийн тухай наргиантай дурсамжууд ч багтжээ. Хэдийгээр ном бүхэлдээ эгэл сэтгүүлчийн туулсан замналын өнгө аястай ч манай улсын нэгэн жарны түүхийн амьд гэрч яахын аргагүй мөн болохыг уншигч та олж харах бизээ.

Номыг Хасу худалдааны төвийн 2-р давхрын номын тасгаас худалдан авч болох юм байна.