Аймгийн ИТХ-ын даргын 2022 оны 12 дугаар сарын 20-ны өдрийн захирамжаар тус ажлын хэсгийг аймгийн ИТХ-ын төлөөлөгчид болон холбогдох мэргэжлийн байгууллагын төлөөлөл бүхий 12 хүний бүрэлдэхүүнтэй байгуулсан.
Ажлын хэсэг нь өнгөрөгч өдрүүдэд Дөрвөлжин сумын нутагт үйл ажиллагаа явуулж буй “Баян-Айраг Эксплорэйшн” ХХК, Завханмандал сумын нутагт үйл ажиллагаа явуулж байгаа “Шувуун хар уул” ХХК-иудын уул уурхайн олборлолт болон бусад ажилтай танилцлаа.
Ажлын хэсгийн ахлагчаар аймгийн ИТХ-ын төлөөлөгч Д.Уужимсанаа ажилласан бол гишүүдэд аймгийн ИТХ-ын төлөөлөгч Б.Ринчиндорж, Г.Цогзолмаа, Б.Эрдэнэбаяр, Д.Пүрэвдорж болон аймгийн Татварын хэлтсийн дарга Л.Содном, Хяргас нуур-Завхан голын сав газрын захиргааны даргын үүргийг түр орлон гүйцэтгэгч Э.Зол-Од, аймгийн ИТХ-ын Хэвлэл мэдээлэл, гадаад харилцаа хариуцсан мэргэжилтэн Ё.Загдсүрэн нарын хүмүүс оролцсон юм.
